నీకో ప్రేమలేఖ

నీ ఊరే,
28th April, 2k.

నేను క్షేమం.

ప్రియమైన బావకు,

నీ లక్ష్మి వ్రాయునది. నువ్వు క్షేమం అని తలుస్తాను. అవును క్షేమమేనా ? - గ్రీష్మాన్నే శిశిరంగా ఎంచి ఈ వసంతం కోసం... కేవలం ఈ వసంతం కోసమే కదూ నువ్వు ఉద్యోగం సంపాదించడం విషయంలో కష్టపడుతున్నది. నువ్వు లేక మన ఊరు నాకైతే మూగపోయిందా అనిపిస్తోంది. ముఖ్యంగా మా ఇంటి ముందున్న వీధి. రోజుకి ఒకసారైనా నేను కనబడకపోతే ఒక మనిషి కళ్ళు మా ఇంటి ముందు నుండి వెళ్తూ మా ఇంటి లోపలికంటూ వెదికేవి. ఆ మనిషి ఎవరో నీకు నాకు మాత్రమే తెలుసనుకుంటున్నాను.

నేను ఎగ్జామ్స్ బాగా రాయాలని కష్టపడి చదువుతున్నా, కాని నామనసు నా మాట వింటేనా? బెల్లం చుట్టూ ముసిరి ఉన్న ఈగల్ని ఎంత తరిమినా మళ్ళీ ఎలా వచ్చి వాల్తాయో అలా నీ తాలూకు మధురమైన ఆలోచనలు ఎంత వద్దని వారించినా క్షణాలలో ముప్పిరిగొనేవి. (పోలిక బావుందా?) వాటికేం తెలుసు నాకు పరీక్షలని, నాకు తెలుసుకాని.

బావా! (ఇలా పిలిస్తే భలే బావుంది కదా!) నీ మనసు నాకు తెలుసు, నేను లెటర్ రాయలని కోరుకుంటావని - నా లెటర్ కోసం ఎదురుచూస్తుంటావని. కాని నేను లెటర్ రాస్తే నువ్వు ఇంకా నా గురించే ఆలోచిస్తూ ఉంటావని నా భయం. నువ్వు అక్కకి రాసిన లెటర్ అక్క చూపించింది. అందులో నేను నీకు లెటర్ రాయలేదేమని నన్ను నువ్వు తిడతావని ఆశించాను. ఆ ఊసే లేదు. నువ్వు చెబితేనే లెటర్ రాయాలని కాదు, కాని నువ్వు నేను నీకు లెటర్ రాయాలని ఆశిస్తున్నావో లేదో నాకు తెలియదు. రాయాలని ఇంటిమేట్ చేసాక రాస్తే ఇక అందులో ఇక ప్రేమేముంది అని నువ్వు అనుకుంటూనే నేను అడగకుండా 'తను తనకి రాయాలనిపించి రాయలి' అని నువ్వు అనుకుంటావని నాకు తెలుసు. కాని ప్రేమలో 'నేను నీకోసం అల్లాడిపోతున్నాను' అని తెలియచేయడానికి ఇగో(అహం) ఎపుడూ అడ్డురాకూడదు, అది స్త్రీ అయినా, పురుషుడైనా. సరిగ్గా ఇలాంటి సమయంలోనే పడుతుంది కమ్యూనికేషన్ గ్యాప్ కి బీజం. నేను నీకు ఇంతకు ముందు ఒకసారి చెప్పాను - 'ఈ ప్రపంచంలో ఏ ఇద్దరి మనుషుల ఆలోచనలలో ఫ్రీక్వెన్సీ ఒకే విధంగా ట్యూన్ చేయబడి ఉండదు' అని, కొన్నిసార్లు మాత్రమే కోయిన్సైడ్ అవుతుంది - సరిగ్గా అపుడు మాత్రమే దగ్గరవ్వడం జరుగుతోంది.

కేవలం మరో వ్యక్తి పట్ల, లేదా వ్యక్తిని ప్రేమిస్తుంటే - 'నేను నిన్ను ప్రేమిస్తున్నాను' అని చెప్పి ఊరుకోకూడదని నా ఉద్దేశం. ప్రేమలో కలిగే విరహం, కోపం, కామం, 'నీవు నాకు ఇలా ఉంటే మరింత బాగుంటుంది' అనే భావం ఇవన్నీ ఆ మరో వ్యక్తి దగ్గర వ్యక్తీకరించాలి. అవి తీర్చుకోవాలి కూడా. కేవలం ఆ మనిషి దగ్గరైనా (అది ప్రియురాలి దగ్గరైనా) మనసులో కలిగే రకరకాలైన ఇంటెన్షన్స్ ని బయటపెట్టుకోలేక ఇగోని అడ్డుపెట్టుకుంటే ఇక ప్రేమ ఎందుకు? ప్రేమించడం ఎందుకు?

If you love some one express it అనే దానిలో If you have some feeling express it అనే దానిలో అనేది అంతర్భాగమని గుర్తుంచుకో.

నువ్వెపుడూ నీ చుట్టూ ఒక బిరి గీసుకుని పెట్టేసుకుని ఇది సరైనదే అనుకుంటావు. ఆ బిరి లోపల ఎన్నో రిస్ట్రిక్షన్స్ పెట్టేసుకుంటావు. కాని ఆ బిరి దాటి బయటకు వచ్చి ఆలోచించవు. అక్క అస్తమానూ నాదగ్గర అంటూ ఉంటుంది - 'మనం వాడిని ఏదో ఇంప్రూవ్ చేసెయ్యాలని అనుకుని వాడిని కన్ఫ్యూస్ చేసేస్తున్నామేమో' అని. నీవు నీ అంతట నువ్వు ఆలోచించాలి అంటే మేము నీకు ఏదీ చెప్పకూడదు. కానీ ఏమీ చెప్పకపోతే నీకు ఒక్కోసారి ఏమి చెయ్యాలనేది తోచదు. ఏదీ రిస్ట్రిక్ట్ చేసుకోకు. నేను ఇలానే ఉండాలి అనుకోకు. మరోలా ఉంటే కూడా ఎంత బాగుంటుందో ఆలోచించు. మనం ఏ ఎథిక్స్ ని మీరకుండా నడచుకుంటే తప్పేముంది చెప్పు.

నువ్వు ఏదో ఆలోచన, ఐడియా పెట్టేసుకుని ఇంటికి ఉత్తరం కూడా రాయడం మానేసావు. ఫోన్ చెయ్యడం మానేసావు. క్షేమ సమాచారాలతో ఉత్తరం రాయడానికేం? ఫోన్లో అయితే అన్ని డిటైల్స్ అడుగుతారు. కాని లెటర్లో అవేమీ అడగలేరుకదా! నీ క్షేమం అమ్మ నాన్న గార్కి తృప్తినిస్తుంది. ఆ తర్వాత గొడవ నీ క్షేమాన్ని మించి విలువైనదేమీ కాదు కదా!

బావా ఇవన్నీ నీకు తెలియవని కాదు. నీ ఆలోచనకి తట్టవు. (అలా అని నీది మట్టి బుర్ర అని నేను అనుకుంటున్నానని నీవనుకుంటుంటే అది నా తప్పు కాదని మనవి.) జీవితానికి ప్రేమ, ఆప్యాయత, అనురాగాలు, నిబంధనలు, నిబద్ధత ఇవన్నీ ముఖ్యమే, జీవితానికి మంచి అసిస్టెన్స్ ని ఇస్తాయి, కాని ఆ జీవితానికి ఊపిరి పోయలేవు. ఎంత సెంటిమెంటల్ గా ఉండాలో అంత ప్రాక్టికల్ గా కూడా ఉండాలి. ప్రేమ మధురంగా ఉండాలన్నా, జీవితం అందంగా ఉండాలన్నా డబ్బు ముఖ్యం. అందుకే నువ్వు మంచి ఉద్యోగం సంపాదించాలి. ఇక్కడ నేను, మీ అమ్మ, నాన్నగారు అంతా క్షేమంగా ఉంటాము. మాకు నువ్వు ఏ జాబ్ చేస్తున్నావు, ఎంత సంపాదిస్తున్నావు ? అన్నది ముఖ్యం కాదు. కేవలం నీ క్షేమ సమాచారాలు ముఖ్యం. ఉత్తరాలు రాయి. అలాగని ఎంతైతే ఎటాచ్మెంట్తో ఉంటావో, అంతే డిటాచ్మెంట్తో ఉండడం కూడా అలవాటు చేసుకో. అపుడే మనసు బాగుంటుంది. డీలాగా ఎపుడూ ఉండకూడదు. ఛీర్ వుల్గా ఉండాలి. ఇవన్నీ అక్కడ ఉన్న నీ స్నేహితులు చెబుతారని నాకు తెలుసు, కాని నేను చెబితే వింటావని నమ్మకం.

మా అక్క, అమ్మ అక్క పెళ్ళి హడావుడిలో బిజీగా ఉన్నారు, గుమాస్తాలకు చెప్పి పనులు చేయిస్తున్నారు. ఇపుడు సీజన్ కదా నాన్నగారు పొద్దుట ఆఫీస్ కి వెళ్ళి రాత్రి ఎప్పటికో వస్తున్నారు. నా గురించి నీకు తెలుసు కదా పొద్దుట ప్రోజెక్ట్ తో బిజీ, రాత్రి సమయాల్లో ఎగ్జామ్స్ ప్రిపరేషన్. నువ్వు మాకు బావవే కాదు, అక్కకు క్లాస్మేట్ వి కూడ, సొ తన పెళ్ళికి నువ్వు రాక పోతే నిన్ను క్షమించదు.

ఏయ్ బావా! మరి నువ్వొచ్చినప్పుడు నాకేం తెస్తావు? ఏ కానుకలు తెచ్చినా నాకిష్టముండదు. మనసు నిండా ప్రేమ నింపుకుని కోటి ముద్దులు కొనుక్కుని నాకోసం తీసుకుని రావాలి.

నా ఈ ఉత్తరం నీకు పొజిటివ్ గా పని చేయాలని, నీకు మంచి ఇన్స్పిరేషన్ని ఇవ్వాలని కోరుకుంటున్నాను బావ. కష్టపడితే అద్భుతాలు చేయ్యొచ్చు బావ. ఈ మరదలి ప్రపంచంలో నువ్వూ ఒకడివి కాదు బావా, నా ప్రపంచమే నువ్వు. నా ప్రపంచం అంతా నువ్వు. ముద్దు రుచెరిగినప్పటినుండీ ముద్ద రుచి నచ్చడం లేదు బావ. నాకు మళ్ళీ ముద్దెపుడిస్తావు?

అవును బావా! ప్రియురాలి సమక్షంలో కంటే ఆమె లేని విరహంలో ఆలోచనలు చాలా బాగుంటాయట కదా నిజమేనా? మనిద్దరం ఇప్పటి వరకూ ఒకే ఊర్లో ఉండడం వల్ల నీకు ఉత్తరమే రాయలేదు. బావా! నాకు తోచింది రాసాను. ఈ ఉత్తరం నీకు నచ్చిందా? అవును బావా! నీకు ఈ లక్ష్మి అందంగా ఉంటుందా? చాలా అందంగా ఉంటానా? కొంచమా? ఏయ్ నా జీవితపు రియల్ హీరో - ఇక సెలవు తీసుకుంటాను. మళ్ళీ లెటర్లలో కలుద్దాము. హ్యాపీగా ఉండు బావా. జీవితమే ఒక బరువు, హ్యాపీ గా లేకపోతే మరింత బరువుగా ఉంటుంది. మా అందరికీ నీ క్షేమసమాచారాలు ముఖ్యం. లెటర్స్ రాయడం మరచిపోకు. హ్యాపీనా?

ముద్దులతో,
నీ... 

కౌగిలి ముద్దలు

విరహ వేదనలో నా ఆకలి నీకు దయను కలిగిస్తే
మల్లిపూవుల పక్క ఒకటి అరటియాకుగా నువ్వువేసి
తీపిముద్దులను నంజుకోసం
వేడి కోరికల అన్నం పెట్టి
తపన కౌగిళ్ళను ముద్దలుగా
వలపు పరువంతో తినిపించి - గెలుపు గుర్రాన్ని తలపించి
ఆకలంతటిని పంపేసి - నా యద వాకిటను నిదిరించే

నన్ను నిమిరిన నీ చేయి - ప్రేమను మించిన పైచేయి.

అభిషిక్తం

ఆ ఆకాశంలో వెన్నెల వెలిగిస్తే వెలిగే దీపం కాదు
ఈ హృదయంలో ప్రేయసి చెరిపేస్తే చెరిగే రూపమూ కాదు -
నువ్వు, నేను, మన మధ్య ఈ ప్రేమ
ఇవన్నీ తొలగిపోయేది
చెరిగిపోయేది
మట్టితో మనమభిషిక్తులమయ్యాకనే
అంత వరకూ ప్రేయసీ!
నువ్వెవరైవైనా
నువ్వెక్కడున్నా
ఈ రెండు హృదయాలూ
ఒకానొక శూన్యంలో
ప్రేమ అనే వారధితో బంధింపబడి
వేదనతో కూడిన తృప్తిని
మైమరచిపోయి అనుభవిస్తూనే ఉంటాయి.

పదిలం

ప్రియా!

ప్రపంచంలో నేను చూసిన అందం
నీతోపాటూ కనుమరుగైపోయింది

అనుభవంలో నేను పొందిన ఆనందం మాత్రం
నీతోపాటూ నా హృదయంలో పదిలమై పోయింది.

నీ రూపం - ఒక ధ్యానం

నే కనుల మూయిటే ఒక పాపం
వచ్చి నిలుచునే నీరూపం

నా మనసులోనికి ఒక పయనం
నీ చెంత నిలుచుటే ఒక ధ్యానం.

పోయిన ప్రాణాలు...

ప్రభూ!

నేను మరణించిపోతాను అని నాకు ముందే తెలిస్తే
నేను ఫక్కున నవ్విపోతాను - ఎందుకంటే -
నేను ఒక దేవత ప్రేమకు దూరమైన రోజున
మరణించిపోయాక కూడా
కొత్తగా మీరొచ్చి తీసుకుపోయే ఈ ప్రాణాన్ని చూసి
నేను ఫక్కున నవ్వుతాను.

నీ జ్ఞాపకంతో...

ప్రియా!
నేను నీ జ్ఞాపకంతో కళ్ళు మూసుకుంటే
జరిగేదే ఒక అద్భుతసృష్టి
దానికి విధి కథ రాసే బ్రహ్మను నేనే
ఆ ఊహే మధురంగా ఉంటుంది,
పిచ్చిగానూ ఉంటుంది
కాని అంత పెద్ద బ్రహ్మ కూడాను
ఒక చిన్న కన్నీటిచుక్కకే కొట్టుకుపోతాడు.

నా నీడగా నువ్వు...

నీడలో మనిషి లేడనేది నిజం
మనిషి లేకుండా నీడ లేదనేది కూడా నిజం
కాని ప్రియా!
మనిషిగా నేను, నా నీడగా నిన్ను భావిస్తే
ప్రేమ ఉన్న వెన్నెల వెలుగులో
నేనున్న ప్రతీచోట నీవు నీడగా ఉన్నట్లే
కాని ఆ నీడలోనే నీవు లేవు.

ఈ అక్షరాలు...

ప్రియా!

నీ జ్ఞాపకంలో నేను రాసిన ఈ అక్షరాలు -
పొందికగా అమరిన కవితలు,
వెన్నెల జలపాతంలో పన్నీటి కెరటాలు,
మరపురాని సంధ్యలో ఆహ్లాదమైన కిరణాలు,
నునువెచ్చటి వేకువలో మనసైన నేస్తాలు,
భారాన్ని తగ్గించి భావాన్ని తీసుకొచ్చే విలువైన రాయభారులు,
భావం సరిగా పలకకపోతే చిన్నబుచ్చుకునే చిన్నారులు,
సిగ్గుపడే నిన్ను నా చెంతకు అనునయంగా చేర్చే పరిచారికలు,
నవ్వుల వెన్నెల బొమ్మగా నిను చూపే చలనచిత్రాలు,
స్వయంవరంలో వీరుని గెలుపుకై ఆరాటపడే రాకుమార్తెలు,
ఎవరూ కానరాని చోట భువికేతించి నాట్యమాడె అప్సరసలు,
ఆఖరిగా ...
నా ఊహాలోకంలో
నిన్ను నాచెంతకు చేర్చి
మహగొప్ప ఆశీస్సులనిచ్చే ఆత్మబంధువులు.

సొగసిరి-గడసరి

వల్లమాలిన సిగ్గులొలికే మేలిమే నన్ను చేరిన సొగసిరి
నన్నుచేరి వలపు పిలుపుల ఆటలాడె గడసరి
మత్తుచూపుల తేనె జల్లుకు నా మనసు పని ఇక సరిసరి
కైపు ఊపుల సయ్యాట వేడిలో నిదుర రాదా ఈ రాతిరి?

గెలుపు రాని ఓటమి

ప్రపంచంలో మరే విషయంలో అయినా కాని
ఓటమి తర్వాత గెలుపు రావచ్చు
కాని ప్రియా!
నిన్ను నిన్నుగా నేను కోల్పోయాక కూడా
ఓటమి తరువాత మరెన్నటికీ గెలుపు రాదు,
అయినా అది ముగింపు అనడానికి మనసూ రాదు...

యవ్వనం

...యవ్వనం ఒక వరం
అందునా తిరిగి పూయని ఒక వనం.

నీరూపం - నీ శాంతం

అలలు అలలుగా నీ రూపం - నా యదల లోయలో కదలాడె
వెన్నెల కెరటమై నీ శాంతం - నను నిప్పు కిరణమై రగిలించె

విఫలయత్నం

నీ మనసున ఉప్పొంగి పొంగే
నీ ప్రియురాలి జ్ఞాపకాలు ,
అవి సృష్టించే హృదయాగ్ని కీలలు
నిన్నే దహించి వేస్తున్నపుడు
ఆత్రంగా వాటినార్పడాన్కి
నిష్ప్రయోజనమైన ప్రయత్నం నేను చేస్తాను, విఫలమై
నిస్సహాయంగా కన్నీటిచుక్కనై వెలుపలికి వస్తాను -
ఆనక దీనంగా ఆవిరౌతాను.

కన్నీటి బొట్టు

తిష్ఠవేసిన ప్రియురాలి
జ్ఞాపకాలు మదిలోన

చోటులేదే లోలోన
తన్నుకొస్తిని దీనంగా...

ఆత్మ లేని ప్రార్ధన

ఓ ప్రభూ

నిన్ను చేరడానికి

నాకుకొన్ని పూలంటూ ఉండాలి - నిన్ను అర్చించడానికి,
కొన్ని పాలంటూ ఉండాలి - నిన్ను అభిషేకించడానికి,
కొన్ని పళ్ళంటూ ఉండాలి - నీకు నివేదించడానికి...

కాని ప్రభూ

వీటన్నిటికీ మించి నాకొక మనసంటూ ఉండాలి -
అది నేను తిరిగి పొందడానికి మరొ జన్మంటూ ఉండాలి.

హృదయబాధ

ప్రియా!

నీకెటుల  తెలుపగలనే మన ప్రేమ గాధను మోసే నా హృదయబాధను

మరవగలనే ప్రియా

పచ్చి పచ్చిగ పరవళ్ళాగని పడవేసే మాటలు
గుచ్చిగుచ్చి చూడగ గుబులెక్కించే చూపులు
వచ్చివచ్చి చేరగా మత్తెక్కించే చేతలు
నచ్చినచ్చి గెలిచిన మైమరపించే స్పర్శలు

మరవగలనే ప్రియా నే మరవగలనే

కన్నీటిచుక్క

ప్రియా!


నీవొచ్చి ముద్దిచ్చినపుడు ప్రపంచమే రెక్క విదిల్చింది
నీవు నన్ను విదిల్చికొట్టినపుడు మనసొక కన్నీటిచుక్క రాల్చింది.

పరధ్యానం

... నీవు లేని నాకేది ధ్యానం
మిగిలింది నాకిక పరధ్యానం ...

కాలం

ప్రియా!

చూడు 

నీవున్నపుడు దానిని గుర్తించలేదని కోపంతో పరుగులెట్టి
నీవులేనపుడు వెక్కిరిస్తో నెమ్మదిగా అడుగులో అడుగులేస్తోందీ కాలం

ప్రేమ

స్నేహమనే బావిలో 'పంచుకోవడమనే' బాల్చీ వేసి తోడుకుని తెచ్చుకున్నప్పుడు పుట్టిన అమృత జలమే ప్రేమ.

నీవే నామనసు

కేవలం నేనే ఈ జన్మకు తనువు
ప్రియతమా! ప్రతి జన్మకు నీవే నామనసు.

ప్రేమంటే...

లేచున్నపుడు ఇలలో
నిదురున్నపుడు కలలో
నన్నే మరచి
నిన్నే వలచి
నువ్వే కావాలని
నిన్నే గెలవాలని -
నిరంతర యానంలా సాగే తపన
దేవుని ముంగిట నిలచే ప్రార్ధన... ప్రేమంటే!

కన్నీటి చుక్క

నీప్రేమ కధకొక సాక్షాన్నై
నీమౌన వ్యధకొక భాష్యాన్నై
నీ మనసును తెలిసిన నేస్తంగా
నిను వీడి నేను పోకున్నా
వీడకపోతే నేలేకున్నా...

యుగాలై నడుస్తున్న కాలంలో

నీ చిర్నవ్వు గుర్తు
ఒక కన్నీటి బొట్టు
కలగలసి పోతే
నాకొక రోజు గడిచినట్టు,
ఒక యుగం దొర్లినట్టూను.

ప్రియా నువ్వెక్కడ ఉన్నావు?

ఒక వేకువ జాము మొదటలో నీవు గుర్తొస్తే
ఆనాటి వెలుగంతా నాకు చీకటే

ఒక సందె పొద్దు చివరలో నీవు గుర్తొస్తే
ఆనాటి రాత్రంతా నిదుర కరువే!

ప్రార్ధన-ప్రారబ్దం

ప్రియా!
ఒక ప్రార్ధన నుండి జనించని ఒక వరం
ఒక ప్రారబ్దం నుండి మరణించని ఒక శాపం
కలసి ఇపుడు మన మద్య సృష్టించినదే ఈ దూరం.

మనసుకు ఎవరూ లేరు

ప్రియా నీవెళ్ళిపోయాక కూడా
నాకు చాలామంది ఉన్నారు
కాని...
నామనసుకే ఎవరూ లేరు..  పాపం... 

మనలోని...

మనలోని వెచ్చదనం
మనలోని స్వచ్చదనం
తిరిగి ఏపుణ్యాలు చేస్తే
తిరిగొస్తాయి ప్రియతమా?

విహంగవీక్షణం

నీవు నాకై చూసే చూపు అరక్షణం
నా మనసు తేలియాడె విహంగవీక్షణం

పరిచయం లేని ఎదురుచూపు

సాయమవుతున్నా సాయానికే రావు
రాత్రైతే నామనసు నైరాశ్యమై పోవు
ఐనా వచ్చేస్తున్నా అనే ఊసే పంపబోవు
ఇంతకూ పరిచయమే కాని ఎవరు నీవు?

ప్రియా! మరచి పోవద్దు

ప్రియా!

ఆనాటి

వెన్నెల పొద్దు
కౌగిలి హద్దు
తియ్యటి ముద్దు
మరచి పోవద్దు.